Misioni i KFOR-it i drejtuar nga NATO në Kosovë ka dënuar ashpër sulmet ndaj policisë së Kosovës në veri të vendit.

Në një përgjigje nga KFOR-i kanë thënë se dënojnë ashpër sulmin ndaj Policisë së Kosovës dhe se janë të gatshëm të mbështesin Policinë e Kosovës sa herë që ka nevojë.

“Misioni i KFOR-it i drejtuar nga NATO dënon ashpër sulmet e fundit kundër pjesëtarëve të Policisë së Kosovës. Ne konfirmojmë gatishmërinë tonë për të mbështetur Policinë e Kosovës, nëse është e nevojshme dhe e kërkuar”, ka thënë Vincenzo Lipari, shef i Zyrës për Marrëdhënie me Publikun në KFOR.

Në reagimin e tyre po ashtu KFOR ka deklaruar se presin nga të dy palët që të veprojnë me përgjegjësi dhe të mos bëjnë veprime që ngrisin tensionet e ndikojnë negativisht në sigurinë e Kosovës.

“Ne presim që të gjitha palët të veprojnë me përgjegjësi dhe konstruktive, dhe të përmbahen nga veprimet që mund të përshkallëzojnë në mënyrë të panevojshme tensionet, të ndikojnë negativisht në sigurinë në Kosovë dhe stabilitetin në të gjithë rajonin. KFOR-i mbetet plotësisht i fokusuar në zbatimin e përditshëm të mandatit të tij të OKB-së, për të siguruar një mjedis të sigurt dhe të sigurt dhe lirinë e lëvizjes për të mirën e të gjitha komuniteteve që jetojnë në Kosovë”, është deklaruar shefi i Zyrës për Marrëdhënie me Publikun.

Kujtojmë se sot në një konferencë të jashtëzakonshme për media, ministri i Punëve të Brendshme, Xhelal Sveçla ka thënë se nga 13 prilli Policia e Kosovës është sulmuar katër herë në këtë pjesë të Kosovës.

“Grupe të ndryshme në katër ditë të fundit kanë realizuar 4 sulme në atë zonë. Tentim sulmi i parë ka ndodhur duke vendosur iriza metalikë, në kohën e njëjte me sulmin e sotëm me qëllim që të pamundësojnë punën e policisë së Kosovës dhe të rrezikojnë drejtpërdrejt jetën e Policisë së Kosovës. Sulmi i dytë ka ndodhur me gjuajtje me gurë në veturën e policisë së Kosovës ka ndodh mbrëmë. Është gjuajtur me armë zjarri. Dhe sot drejtpërdrejtë janë goditur dy veturat të cilat transportonin zyrtarët policorë për në pikat kufitare. Ky është një ndërrim i rregullt i Policisë së Kosovës që ndodh në orën 8. Dhe dy nga ato akte sulme kanë ndodh në atë kohë. Po shihet se angazhimi serioz i institucioneve të Kosovës, që të vendos rend dhe ligj në çdo cep të Kosovë është bërë pengesë për Serbinë, për grupet e caktuara që mbështeten drejtpërdrejt nga Serbia dhe u prish planet gjithë atyre që Kosovën e kanë parë si çerdhe të krimit të tyre’’, ka thënë Sveçla.

Ndërsa sulmi ndaj policisë në veri të vendit sot është bërë me armë dhe granata dore. Ndërsa para këtyre sulmeve ministri ka deklaruar se edhe një rast tjetër policia e Kosovës është sulmuar me gurë dhe iriqë të hekurt.