Ministria e Industrisë, Ndërmarrësisë dhe Tregtisë, Rozeta Hajdari ka thënë se ka udhëhequr dhe mbështetur ekipin e KD Business Development, që nga vera e vitit 2021, për realizimin e projektit strategjik të parkut të biznesit në fushën e inxhinierisë mekanike dhe konstruksionit metalik në Republikën e Kosovës.

Sipas saj, ky park gjerman i biznesit do të vendoset në zonën ekonomike të Lipjanit, e certifikuar dhe ndërtuar me investime nga MINT dhe pranë rinisë sonë në Prishtinë, që është brezi i ri premtues për inovacion dhe transformim industrial.

“Parku i biznesit gjerman përfshin edhe qendrën e trajnimit, përkatësisht transferimin e njohurive dhe transferimin e teknologjisë, i cili ka për qëllim ngritjen e industrisë së kualifikuar të metaleve në Republikën e Kosovës, me një grup deri në 15 ndërmarrje të vogla dhe të mesme gjermane nga sektorët e inxhinierisë mekanike, konstruksionit metalik dhe industrive të ngjashme. Parku gjerman i biznesit do të mundësojë transformimin e industrisë së Kosovës, me më shumë inovacion dhe investime për zhvillim të produkteve dhe ndërtim të një ekosistemi, që mundëson punësim dhe zhvillim më të shpejtë industrial, duke u bazuar në përvojën dhe modernizimin e ndërmarrjeve gjermane. Jam e lumtur qe bashkëpunimi ynë i suksesshëm gjerë më tani, ka rritur besimin dhe po bindë gjithnjë e më shumë investitorë për të investuar në Kosovë, sikurse tani në fushën e inxhinierisë dhe ndërtimit, të cilët tashmë kanë ndarë mjete dhe janë duke u përgatitur për ndërtimin e fabrikave të tyre në Kosovë”, ka shkruar ajo në Facebook.

Ndëkrohë, mbrëmë është bërë hapja solemne e kompanisë së parë gjermano-kosovare “KICK Engineering & Manufacturing Kosovo” Sh.P.K – si pjesë e KD Business Development GMBH dhe hap i parë historik për themelimin e parkut gjerman të biznesit në fushën e inxhinierisë mekanike dhe konstruksionit metalik në Kosovë.

Hajdari ka shkruar se bashkë me kryeministrin Kurti, kanë shprehur mirëseardhje investitorëve të rijnë gjerman, duke shtuar se janë të përkushtuar në misionin e përbashkët për zhvillimin dhe transformimin e industrisë së vendit tonë.